حاب تتعلم حاجة جديدة ؟ جرب تقنية فينمان !

مقدمة

عمرك حسّيت روحك راك تقرا وتراجع، بصح كي يجي الوقت باش تشرح ولا تطبق، تحسّ كلشي تبخر؟
هنا تدخل “تقنية فينمان” — طريقة بسيطة وفعالة باش تتعلم أي حاجة بعمق وتفهمها، ماشي غير تحفظها.

هاد التقنية جا بها الفيزيائي المعروف ريتشارد فينمان، وكان يقول:

“إذا ما قدرتش تشرح الموضوع لطفل صغير، فراك ما فهمتوش مليح.”
If you can’t explain it to a five-year-old, you don’t understand it well enough

فينمان كان معروف بأسلوبه في التبسيط، وهادي التقنية تعتمد على الشرح كوسيلة للفهم الحقيقي.

شكون هو فينمان؟ واش يقصد بالفهم؟

ريتشارد فينمان (Richard Feynman) كان عالم فيزياء أمريكي، حائز على جائزة نوبل، وواحد من أشهر العقول العلمية في القرن العشرين.

خدم في مشروع مانهاتن النووي، وشارك في تطوير النموذج الكمي للفيزياء، وفاز بـ جائزة نوبل في الفيزياء سنة 1965.
كان معروف مش برك بالذكاء تاعو، بل بالقدرة العجيبة تاعو باش يشرح مفاهيم معقدة بلغة بسيطة يفهمها أي واحد، حتى لو ما عندوش خلفية علمية.

فينمان ماكانش يحب الحفظ الأعمى، وكان دايمًا يقول باللي الفهم الحقيقي يبان كي تقدر تشرح المعلومة بطريقة واضحة لإنسان ما يعرف والو على الموضوع.

بمعنى آخر:

“ماكاش فهم بلا شرح. وإذا الشرح تاعك فيه لفّ ودوران، فراك راك تخبّي على روحك باللي ماكش فاهم مليح .”

الهدف عندو ماكانش تجمع معلومات، بل تبني طريقة تفكير توصل بيها للجوهر تاع الحاجة.

مراحل تقنية فينمان (4 Steps)

تقنية فينمان فيها 4 مراحل بسيطة، بصح فعالة بزاف. الهدف منها هو تكشف وين راك فاهم بصح، ووين راك غير حافظ.

اختار موضوع تحب تفهمو

Nmap، Web Exploitation، DHCP، أو حتى كيفاه تخدم نظام حجوزات فالفندقة.

أهم حاجة: لازم يكون موضوع تحب تعرف عليه أكثر، وتفهمو مشي غير تقرا عليه.

شرحو وكأنك تهدر مع واحد ما يعرف والو

تخيّل روحك تشرح لصاحبك ولا لأخوك الصغير:
استعمل كلمات بسيطة، أمثلة من الحياة اليومية، وتجنب المصطلحات الثقيلة.

ما تقولش: “DHCP هو بروتوكول layer 7 ديناميكي لتوزيع العناوين.”
قول: “هو نظام يمد للآلات فالنت عنوان IP أوتوماتيكياً بلا ما تدخلو يدوي.”

كي توقف ولا تتعطل، هادي علامة

إذا حسيت روحك تعثرت، ولا ما عرفت تكمل الشرح، هادي النقطة لي ماكش فاهمها مليح.
هنا لازم ترجع تقرا، تسقسي، تشوف فيديوهات، وتغوص في التفاصيل حتى تولّي قادر تشرحها بسلاسة.

عاود الشرح بطريقة أبسط

بعد ما تعاود تفهم النقاط لي وقفتك، لازم تعاود تشرح الفكرة بلغة أوضح وأسهل.
استعمل أمثلة من حياتك اليومية، باش تكون أقرب للفهم.

مثلاً:

SSH: كيما كي تكون بعيد على الكمبيوتر تاعك وتحب تخدم عليه من تليفونك ولا من جهاز آخر، SSH يخليك تتحكم فيه عن بعد، كيما ريموت كنترول، بصح بكود سري وآمن.
Encryption: تخيل تبعث مساج لصاحبك فـ WhatsApp، والمساج يتكوّد بطريقة خاصة ما يفهموها حتى واحد في الطريق — غير هو لي عندو المفتاح باش يفك التشفير ويقرا الرسالة.

علاش التقنية تخدم ؟

كاين بزاف طرق للمراجعة: تقرا بصوت عالي، تحفظ، تعاود تشوف فيديوهات، بصح تقنية فينمان تجيب حاجة مختلفة:

1. التعليم النشط (Active Learning)

تقنية فينمان تجبرك تخرج من وضعية “المتلقي” وتدخل في وضعية “المعلم”.
وهذا يحفّز الدماغ يربط المعلومات، يصحّح الأخطاء، ويعمّق الفهم.

الدماغ يتعلم أكثر كي يخدم، ماشي كي يسمع برك.

2. تكشف الثغرات

لما تبدأ تشرح موضوع وتحس روحك “تعثرت”، هنا راك تلقى فجوة في الفهم.
تقنية فينمان تخليك تكتشف وين ما فهمتش، عوض ما تغلط وتحسب روحك فهمت وانت غير حافظ.

3. تركيب المفاهيم بلغتك

كي تشرح بكلماتك، راك تبني روابط عقلية جديدة:
من المفهوم → للكلمة → للتجربة → لصورة ذهنية.

هذي الروابط تخلي المعلومات تثبت في الذاكرة طويلة المدى.

4. الاسترجاع النشط (Active Recall)

كي تعاود تشرح من ذاكرتك، راك تمارس الاسترجاع النشط، وهي تقنية مثبتة في علم النفس التربوي باش ترسّخ المعلومات بشكل أقوى من القراءة أو التكرار فقط.

5. التكرار المرحلي (Spaced Repetition)

لما تراجع شروحاتك وتعاود تشرحها، راك تطبق التكرار المرحلي بدون ما تحس، مما يعزز التثبيت على المدى الطويل.

نصائح باش تستعمل تقنية فينمان بذكاء

كي تتعلم حاجة جديدة فـ الأمن السيبراني، الشبكات، DevOps، ولا حتى أي مجال تقني ولا علمي آخر، تقنية فينمان تقدر تعاونك تفهم بعمق وتراجع بذكاء.

ها بعض النصائح باش تطبقها بطريقة فعالة:

1. خير مواضيع صغيرة

ماشي لازم تشرح “الشبكات” ككل، بدا مثلاً بـ “كيفاش يخدم DNS؟” ولا “وش هو HTTPS؟”.

2. ركّز على الفهم، ماشي الحفظ

كي تشرح، اسأل روحك:

“لو كان طفل ولا زميل ما فهمش، واش السبب؟”

لو حسيت بالكلمات خارجة محفوظة، أرجع وحاول تفهمها من مصدر آخر.

3. دوّن كلش

متخليش الشرح في راسك برك. كتب كل فكرة بكلماتك، زيد عليها أمثلة، رسومات، ولا حتى سيناريوهات.

4. اختبر الشرح قدام روحك ولا حد آخر

ما عندكش شخص؟ تقدر تسجّل صوتك، ولا تشوف روحك تقدر تشرح قدام مراية.
الغرض هو أنك تحس واش ناقص، وتعاود ترجعه للمراحل السابقة.

5. راجع دورياً

تقنية فينمان تقدر تخدم كـ tool للمراجعة الأسبوعية. رجع لملاحظاتك، وعاود شرحها بنفسك.

وين تستعمل تقنية فينمان؟

كي تراجع للامتحان.
كي تحضر محاضرة ولا عرض.
كي تتعلم حاجة جديدة فـ الأمن السيبراني، الشبكات، DevOps، ولا حتى أي مجال تقني ولا علمي آخر، تقنية فينمان تقدر تعاونك تفهم بعمق وتراجع بذكاء.

تقنية فينمان مشي مرحلة وحدة… هي دورة

كل مرة تشرح، راك تحفر أعمق في الفهم تاعك. ما تخافش تعاود تعود الشرح مرات. كل مرة، راك تطور نسخة أحسن من الفكرة في دماغك.

كيفاش تستعمل Obsidian مع تقنية فينمان

تخيل حبيت تفهم مفهوم “البروتوكولات في الشبكات”.

أنشئ صفحة جديدة في Obsidian بعنوان البروتوكولات.
ابدأ تشرح بكلماتك:
مثلًا: “البروتوكول هو كيفاش جهازين يهدروا مع بعض بلغة مفهومة. HTTP مثلاً كي تكون تبعث وتستقبل صفحات الويب.”
استعمل روابط داخلية:
كي تذكر مصطلحات كيما HTTP, TCP, IP، ديرلهم صفحات خاصة تربطهم بـ [[HTTP]]، [[TCP]]… باش تبني شبكة مفاهيم تربط بعضها.
رجع للصفحات later وراجعهم:
إذا لقيت صعوبات تشرحهم ببساطة، رجع للمصادر، وعود صياغة التفسير.

نصيحة: استعمل plugin تاع “Markdown callouts” باش تميز الشرح من الأمثلة والأسئلة، كيما:

[!question] واش الفرق بين TCP و UDP؟
> TCP يضمن التوصيل، UDP أسرع لكن ما يضمنش.

خاتمة

تقنية فينمان ماهيش مجرد طريقة تقرا بيها…
هي وسيلة باش تفهم بعمق، وتكتشف الثغرات في تفكيرك، وتبني ثقة في روحك وقدرتك على الشرح والتطبيق.

جربها اليوم، حتى ولو على أبسط مفهوم، وشوف كيفاش راح يتغير فهمك.
وما تنساش: “الفهم الحقيقي يبدأ كي تقدر تشرحو لواحد ما يعرف والو.”

الفهم الحقيقي يبدأ كي تقدر تشرح حاجة  لواحد ما يعرف عليها  والو

مراجع

Manhasset Media (2022) – The Feynman Technique: Learning Through Teaching. Retrieved from https://manhassetmedia.org/wellness-corner/the-feynman-technique-learning-through-teaching
Richard P. Feynman (1985) – “Surely You’re Joking, Mr. Feynman!”. W. W. Norton & Company.
Farnam Street – The Feynman Technique: The Best Way to Learn Anything. https://fs.blog/feynman-learning-technique